اسرائیلی فوج کا ظالمانہ کریک ڈاؤن جاری، کئی فلسطینی شہر میدان جنگ بن گئے

فلسطین کے مقبوضہ مغربی کنارے میں غاصب اسرائیلی فوج کا ظالمانہ کریک ڈاؤن جاری ہے۔ جمعہ کو علی الصباح صہیونی فوج کی کارروائیوں میں ایک فلسطینی شہید جبکہ درجنوں زخمی اور گرفتار کیے گئے ہیں۔

بیت المقدس میں کارروائی

اسرائیلی فوج نے تلاشی کی سرگرمیوں کا دائرہ بیت المقدس تک بڑھا دیا ہے۔ اطلاعات کے مطابق شمالی بیت المقدس میں قلندیہ پناہ گزین کیمپ پراسرائیلی فوج نے چھاپہ مارا تو مقامی باشندوں کی صہیونی فوجیوں کی مزاحمت کی۔ اس پر قابض فوج نے طاقت کا استعمال کرتے ہوئے ان پر فائرنگ کردی جس کے نتیجے میں متعدد افراد زخمی ہوئے ہیں۔

بیت المقدس کے طبی ذرائع کے مطابق اسرائیلی فوج کے ساتھ جھڑپوں میں زخمی ہونے والے متعدد افراد کو اسپتالوں میں لایا گیا ہے۔ زخمیوں میں بیشتر نوجوان اور کم عمر لڑکے شامل ہیں۔

عینی شاہدین کا کہنا ہے کہ قلندیہ میں فلسطینی شہریوں اور صہیونی فوج کے درمیان تصادم اس وقت ہوا جب قابض فوجیوں نے لوگوں کے گھروں میں گھس کر توڑ پھوڑ شروع کی۔ اس پرشہری مشتعل ہوگئے اور انہوں نے دشمن فوجیوں پر سنگ باری کی۔ جواب میں صہیونی فوج نے ان پر لاٹھی چارج کیا، آنسو گیس کے علاوہ براہ راست فائرنگ کی گئی جس کے نتیجے میں کئی افراد زخمی ہوگئے۔